“Oficerë në shkolla”. Kështu quhet nisma më e re e qeverisë shqiptare dhe Ministrisë së Arsimit e prezantuar këtë të hënë në Tiranë nga Kryeministri Edi Rama.
Në fjalën e tij nga shkolla “Qemal Stafa” në kryeqytet, Kryeministri Rama theksoi se në çdo gjimnaz të Shqipërisë do te vendosen oficerë policie të cilët do të kujdesen për sigurinë e mësuesve dhe nxënësve.
“Oficerët do të jenë burra e gra që do vendosen fillimisht në 15 shkolla, si pjesë e parë e zbatimit të programit në funksion të shtrirjes më pas të këtij programi në të gjitha gjimnazet. Fillon në muajin mars.” u shpreh kryeministri.
Shefi i qeverisë shpjegoi më tej se si do të realizohet kjo nismë dhe se cilat do të jenë konkretisht detyrat e oficerit nëpër shkolla.
“Figura e oficerit nuk është një polic, nuk vjen në komunitetin e shkollës për të ushtruar kontrolle, nuk ka asnjë detyrë për të marrë masa, por i bashkëngjitet trupës mësimore dhe trupës së prindërve, si një figurë kujdestari për mbarëvajtjen e bashkëjetesës jashtë klasës, dhe pjesës jashtë, që do të thotë se ështrë një urë e drejtëpërdrejtë komunikimi. Dhe njëkohësisht një urë me policinë, në gjithë ato rastet që shfaqet nevoja e policisë. Kjo nuk është një eksperiencë mirëfille shqiptare, dhe një eksperiment që e kemi shpikur. Është një eksperiencë që është në vende të tjera dhe është shumë e mirëpritur nga nxënësit dhe mësuesit. Ka rritur ndjeshëm sigurinë në shkollë, dhe komunikimin për të adresuar ato shfaqje shqetësuese.” tha Rama
