Karteli Sinaloa shiste kokainë me logot e Tesla dhe Prada.
Autoritetet në Mexico City asgjësuan 1.6 ton kokainë në ditët e para të gushtit. Pjesa më e madhe e paketimit të drogës kishte logot e Tesla dhe Prada mbi to.
Policia e gjeti dërgesën – një nga më të mëdhatë në historinë e qytetit të Meksikos – në dy rimorkio të mëdha traktori, së bashku me një automjet të tretë që policia tha se po mbronte dërgesën. Autoritetet arrestuan katër persona të përfshirë në transportin e drogës.
Shefi i policisë së qytetit të Meksikës, Omar Harfuch mbajti një konferencë shtypi për të njoftuar “konfiskimin më të madh të kokainës në Mexico City” në 12 vjet. Autoritetet vlerësuan se droga do të sillte fitime rreth 20 milionë euro në rrugët e Meksikës, ose rreth 400 Tesla Model 3.
Harfuch pretendoi se kokaina kishte mbërritur nga Kolumbia në një zonë rreth qytetit bregdetar të Puerto Escondido në shtetin e Oaxaca.
Më 12 korrik, autoritetet u përfshinë në një shkëmbim zjarri të përgjakshëm me anëtarët e dyshuar të kartelit Sinaloa në lagjen Topilejo në jug të Meksikës. Gjithsej 150 oficerë dhe tre helikopterë morën pjesë në operacionin kundër operativëve të dyshuar të kartelit Sinaloa, të cilët u përgjigjën me një arsenal të madh, duke përfshirë granata. Katër policë u plagosën dhe 14 persona u arrestuan.
Në dy vitet e fundit, rreth 50 anëtarë të kartelit Sinaloa janë arrestuar për veprim në Mexico City, sipas gazetës së njohur meksikane El Universal. Në bastisjet e mëparshme, paketat e drogës mbanin logon e Toyota-s.
Përdorimi i emrave të markave të njohura në paketimin e drogës nuk është asgjë e re në Meksikë. Shpesh përdoret për të dalluar cilësinë, produktin ose destinacionin e synuar përfundimtar. Megjithatë, përdorimi i logos së Tesla -s vjen vetëm disa muaj pasi themeluesi i kompanisë, Elon Musk , postoi në Twitter se ai “do të blinte Coca-Cola për ta vendosur përsëri në formulën e saj…kokainën”.
