Pamela Aliaj – Emisioni “Shqiptarët për shqiptarët” është një ndër emisionet që sjell emocione në shtëpitë e shqiptarëve çdo javë.
Ai vjen me raste të ndryshme prekëse nga përditshmëria e shqiptarëve, vuajtjeve e halleve që ata kanë, duke i zbutur sadopak me ndihmën që u jepet nga fondacioni “Firdeus”.
Në emision për t’u bërë qejfin edhe personazheve që janë protagonistët në ngjarje, marrin pjesë VIP-a të ndryshëm, të cilët janë “idhujt” e tyre. Javën që shkoi u prezantua rasti prekës i Linditës. Për vite me radhë Lindita merr mjekimet e saj në Spitalin e Tiranës. Përgjatë gjithë këtyre viteve ajo është njohur edhe me stafin mjekësor, ku shpreh mirënjohje të veçantë për doktoreshë Dhuratën, e cila është përkujdesur për të. Njëherë në çdo 21 ditë Lindita merr mjekimin për sëmundjen që i është rikthyer. Ajo ishte një ditë më se e zakonshme për të.
Madje, vetë Lindita është “çuditur” nga prania e kamerës së emisionit “Shqiptarët për shqiptarët”. Pas perdes së shtratit të Linditës është organizuar gjithçka. Ka qenë pikërisht këngëtarja e mirënjohur dhe shumë e dashur nga publiku, Aurela Gaçe, e cila u bë “bashkëpunëtorja” e emisionit “Shqiptarët për shqiptarët” këtë radhë. Sidriti dhe Aurela u bënë bashkë dhe përgatitën një surprizë për Linditën. Mjekja që ndjek Linditën, Dhurata u fut në dhomë me dy personazhet e maskuar.
“Mjekja” Aurela i mati tensionin Linditës. “Unë nuk marr vesh nga kjo, kam ardhur për një tjetër gjë”, thotë Aurela. Dhe në këtë moment, vjen edhe reagimi emocionues i Linditës, pasi pa nga afër sytë e “mjekes” së re, si dhe kur dëgjoi zërin e saj kaq karakteristik. Pas këtij momenti drithërues, Lindita habitet nga prania e Sidrit Bejlerit në dhomë. “Ma bëtë jetën më të bukur sot”, është shprehur ajo mes emocionesh.
“Mua më thanë se ti je e fortë, thashë të vij ta shikoj njëherë këtë të fortën se kush është”, tha Aurela me shakanë e saj që e karakterizon. Ndërkohë që mes lotësh Lindita i thotë se është fansja e saj, duke treguar qartazi se ajo ishte një ditë shumë e veçantë për të, që vështirë ta harrojë. Momente të tilla të veçanta priten të shoqërohen çdo puntatë të emisionit “Shqiptarët për shqiptarët”.
