Tirana nuk duhej të mundej në Laç dhe ia arriti qëllimit, madje duke thyer edhe “parashikimet”. Bardheblutë kanë fituar 1-3 në këtë fushë të vështirë, ku ndodhi gjithçka. Arbitri Enea Jorgji dha tri penallti dhe të tria u humbën, Kobina dhe Ngo për Tiranën, si dhe Shtubina për Laçin. Greca, Kobina dhe Hasani janë autorët e golave për skuadrën e Memës, që tashmë e ka në dorë qëndrimin në elitën e futbollit shqiptar, pavarësisht fitores së Kastriotit rival me Teutën.
Në javën e fundit të kampionatit, Tirana duhet të mundë Flamurtarin në stadiumin “Selman Stërmasi”. Laçi u duk shumë larg nivelit të tij të zakonshëm në këtë ndeshje. Shtubina është autori i golit të vetëm për ekipin e Starovës, që tashmë ka komplikuar shumë Europën. Është mbyllur ndeshja në Fushë-Krujë, në sfidën mes Kastriotit dhe Teutës, takim që ka përfunduar 2-1 për skuadrën e trajnerit Bledar Devolli. Një fitore me vlerën e 3 pikëve, por duke parë edhe fitoren e skuadrës së Tiranës në Laç, që është edhe rivalja për mbijetesë e krutanëve, duket e ky sukses i krutanëve mund të jetë pa vlerë. Kur jemi një javë para fundit të garës, duket e diferenca mes Tiranës dhe Kastriotit vazhdon që të jetë 2 pikë mes dy ekipeve, por që duket se më afër mbijetesës janë bardheblutë që presin në fundjavën e ardhshme Flamurtarin, ndërsa Kastrioti luan me Kukësin.
